Ils plans d'instrucziun da tudestg e da las linguas estras vegnan preschentads separadamain, han dentant champs da cumpetenza cuminaivels. Tadlar, leger, discurrer e scriver èn attribuids a l'agir linguistic. En Lingua(s) en il focus ed en Litteratura en il focus (tudestg) resp. Culturas en il focus (linguas estras) èn la(s) lingua(s) ed ils products linguistics l'object d'ina confruntaziun pli profunda cun fenomens linguistics.
La 1. e la 2. lingua estra vegnan illustradas mintgamai en in plan d'instrucziun separà. Il punct d'orientaziun e la cumpetenza da basa dal 3. ciclus èn ils medems per domaduas linguas estras. Per la 3. lingua estra vegn descrit in agen plan d'instrucziun per il 3. ciclus.
Cumpetenzas interlingualas che sa sviluppan èn marcadas cun renviaments.
Sequenzas linguisticas tenor regiuns linguisticas
En la suandanta tabella èn menziunadas tut las sequenzas linguisticas pussaivlas.
Linguas da scola
En il plan d'instrucziun per il rom tudestg na datti naginas adattaziuns per il Grischun. La structura ed il cuntegn dal plan d'instrucziun per il rom rumantsch e per il rom talian divergeschan là, nua ch'i èn necessarias cumpetenzas specificas da la lingua.
Tudestg en scolas rumantschas
Tudestg en scolas rumantschas vegn preschentà en in agen plan d'instrucziun e sa cumpona dals plans d'instrucziun da la 1. lingua estra tudestg e da la lingua da scola tudestg. En il svilup da las cumpetenzas stat sur mintga cumpetenza, tge plan d'instrucziun che serva sco basa.
Linguas estras
Tudestg en scolas talianas, talian e rumantsch en scolas tudestgas vegnan preschentads cuminaivlamain en il plan d'instrucziun 1. lingua estra chantun Grischun, ma cun exempels specifics per la lingua. Il medem vala per la 3. lingua estra cun exempels per franzos, talian e rumantsch. Englais sco 2. lingua estra è tuttina per tut las regiuns linguisticas e vegn er preschentà en in plan d'instrucziun separà.
Cumpetenzas da basa
Linguas da scola
Las cumpetenzas da basa en las linguas da scola tudestg, rumantsch e talian sa drizzan tenor las cumpetenzas fundamentalas (standards da furmaziun naziunals). En rumantsch sa refereschan tut las cumpetenzas da basa e fundamentalas en tut ils ciclus a la lingua d'alfabetisaziun. En il 3. ciclus vegnan legids e tadlads singuls texts en rumantsch grischun en quellas scolas che alfabetiseschan en l'idiom, e quai en il senn d'ina avischinaziun.
Las cumpetenzas da las linguas d'arriv che ston vegnir acquistadas s'orienteschan al model da cumpetenzas da la Norma europeica communabla per las linguas (NEC) e resguardan ils nivels intermediars ch'èn vegnids sviluppads suenter. Las formulaziuns èn vegnidas adattadas per part e cumplettadas cun atgnas descripziuns. En connex cun las cumpetenzas pertutgant l'agir linguistic (mintgamai 1. cumpetenza resp. 1. e 2. cumpetenza en discurrer) vegnan preschentads graficamain ils nivels validads (p.ex. A1.1). Tar las cumpetenzas da basa vegnan ultra da quai cumplettads ils nivels cun in'indicaziun a las cumpetenzas da basa (standards da furmaziun naziunals).
Tar paucs svilups da cumpetenzas n'èn vegnidas fixadas naginas cumpetenzas da basa. En connex cun quests svilups na vegni betg premess che las scolaras ed ils scolars stoppian cuntanscher in tschert stgalim da cumpetenza en il ciclus respectiv. Ma els duain survegnir la pussaivladad da lavurar vi dals stgalims da cumpetenza che tutgan tar l'incumbensa dal ciclus respectiv.
Cumpetenzas da basa per il rom d'elecziun en il 3. ciclus
La cumpetenza da basa da la 3. lingua estra (franzos, talian u rumantsch) è vegnida fixada sin basa da trais lecziuns per emna ed onn.
